திருக்குறள் - அதிகாரம் - 82. தீ நட்பு

 

பருகுவார் போலினும் பண்பிலார் கேண்மை

பெருகலின் குன்றல் இனிது. - 811

அன்பானவர் போல நடிப்போர் நட்பு, வளர்வதைவிட நீங்குவதே இனிது 

உறின்நட்டு அறின்ஒரூஉம் ஒப்பிலார் கேண்மை

பெறினும் இழப்பினும் என். - 812

பயன்கருதியே நட்புக்கொள்வோரின் நட்பை இழப்பதே நல்லது

உறுவது சீர்தூக்கும் நட்பும் பெறுவது

கொள்வாரும் கள்வரும் நேர். - 813

சுயநல நண்பர், விலைமகளிர், கள்வர் மூவரும் சமமானவரே

அமரகத்து ஆற்றறுக்கும் கல்லாமா அன்னார்

தமரின் தனிமை தலை. - 814

போர்களத்தில் உதவாத குதிரை போன்ற நண்பர்களை நீங்குவதே நலன்

செய்தேமஞ் சாராச் சிறியவர் புன்கேண்மை

எய்தலின் எய்தாமை நன்று. - 815

சிறியோர் நட்பு தீமைதரும் என்பதால் அவர்கள் நட்பை விடுவதே நன்று

பேதை பெருங்கெழீஇ நட்பின் அறிவுடையார்

ஏதின்மை கோடி உறும். - 816

மூடனிடம் கொள்ளும் நட்பைவிட அறிவாளியுடன் பகை கொள்வதுமேல்

நகைவகைய ராகிய நட்பின் பகைவரான்

பத்தடுத்த கோடி உறும். - 817

சிரித்து நடிக்கும் நட்பைவிட பகைவரால் ஏற்படும் துன்பம் பெரிதல்ல  

ஒல்லும் கருமம் உடற்று பவர்கேண்மை

சொல்லாடார் சோர விடல். - 818

நம் செயலுக்குத் தடையாக இருப்பவர் நட்பை கைவிடுதல் சிறந்தது

கனவினும் இன்னாது மன்னோ வினைவேறு

சொல்வேறு பட்டார் தொடர்பு.- 819

சொல்வேறு, செயல்வேறாக நடப்போர் நட்பு, கனவிலும் துன்பம்தரும் 

எனைத்தும் குறுகுதல் ஓம்பல் மனைக்கெழீஇ

மன்றில் பழிப்பார் தொடர்பு. - 820

அறையில் பாராட்டி, பலர் முன் இகழ்வோர் நட்பு தேவையில்லை