திருக்குறள் - அதிகாரம் - 76. பொருள் செயல்வகை

 

பொருளல் லவரைப் பொருளாகச் செய்யும்

பொருளல்லது இல்லை பொருள்.- 751

மதிப்பில்லாதவர்களும் பொருளால் மதிப்படைவா்

இல்லாரை எல்லாரும் எள்ளுவர் செல்வரை

எல்லாரும் செய்வர் சிறப்பு.- 752

பொருளில்லாரை யாரும் மதிப்பதில்லை, செல்வரையே மதிப்பர்   

பொருளென்னும் பொய்யா விளக்கம் இருளறுக்கும்

எண்ணிய தேயத்துச் சென்று. -753

பொருள் எங்கும், எத்தடைகளையும் கடந்து செல்லும்

அறன்ஈனும் இன்பமும் ஈனும் திறனறிந்து

தீதின்று வந்த பொருள். -754

அறம், இன்பம் இரண்டும் தருவது நல்வழியில் சேர்த்த பொருளே

அருளொடும் அன்பொடும் வாராப் பொருளாக்கம்      

புல்லார் புரள விடல். -755

அருளோடும் அன்போடும் வராத செல்வத்தை விரும்பாதே

உறுபொருளும் உல்கு பொருளும்தன் ஒன்னார்த்

தெறுபொருளும் வேந்தன் பொருள்.- 756

இறையாக வந்த பொருள், வரி, பகைவர் பொருளும் அரசனுக்குரியன

அருளென்னும் அன்பீன் குழவி பொருளென்னும்

செல்வச் செவிலியால் உண்டு. - 757

அன்பின் குழந்தையாம் அருள், பொருளெனும் செவிலியிடம் வளரும்

குன்றேறி யானைப் போர் கண்டற்றால் தன்கைத்தொன்று

உண்டாகச் செய்வான் வினை. - 758

பொருளுடன் தொழில் தொடங்குவது, பாதுகாப்பானது, மகிழ்ச்சியானது

செய்க பொருளைச் செறுநர் செருக்கறுக்கும்

எஃகதனிற் கூரிய தில்.- 759

பகைவரின் செருக்கை அழிக்க, பொருளைச் சேர். அதுவே நற்கருவி

ஒண்பொருள் காழ்ப்ப இயற்றியார்க்கு எண்பொருள்

ஏனை இரண்டும் ஒருங்கு. - 760

பொருளை ஈட்டியவரிடம் அறமும், பொருளும் சென்று சேரும்

திருக்குறள் - அதிகாரம் - 75. அரண்

 

ஆற்று பவர்க்கும் அரண்பொருள் அஞ்சித்தற்

போற்று பவர்க்கும் பொருள். - 741

எதிர்ப்பவர்களுக்கும், அஞ்சுபவர்களுக்கும் பாதுகாவல் அரண்

மணிநீரும் மண்ணும் மலையும் அணிநிழற்

காடும் உடைய தரண். -742

அகழியும், மண்ணும், மலையும், நிழல் தரும் காடும் உடையது அரண்

உயர்வகலம் திண்மை அருமைஇந் நான்கின்

அமைவரண் என்றுரைக்கும் நூல். - 743

உயரம், அகலம், உறுதி, எதிரிகளால் அழிக்க இயலா தன்மையது அரண்

சிறுகாப்பின் பேரிடத்த தாகி உறுபகை

ஊக்கம் அழிப்ப தரண். - 744

கோட்டை பெரிதாகவும், அதன் வாசல் சிறிதாகவும் அமைவதே அரண் 

கொளற்கரிதாய்க் கொண்டகூழ்த் தாகி அகத்தார்

நிலைக்கௌiதாம் நீரது அரண். -745

பகைவா்க்கு அரிதாகவும், தமக்கு வசதியாகவும் அமைவது நல்லரண்  

எல்லாப் பொருளும் உடைத்தாய் இடத்துதவும்

நல்லாள் உடையது அரண். - 746

வீரர்களையும், அவர்களின் தேவைகளையும் நிறைவுசெய்வது அரண்  

முற்றியும் முற்றா தெறிந்தும் அறைப்படுத்தும்

பற்றற் கரியது அரண்.-747

முற்றுகையிலோ, சூழ்ச்சியிலோ வெல்லமுடியாததே நல்ல அரண் 

முற்றாற்றி முற்றி யவரையும் பற்றாற்றிப்

பற்றியார் வெல்வது அரண்.-748

பெரும்படையாலும் அழிக்கமுடியாததே அரண்

முனைமுகத்து மாற்றலர் சாய வினைமுகத்து

வீறெய்தி மாண்ட தரண். - 749

பகைவரை எளிதில் வீழ்த்துமாறு அமைவது அரண்

எனைமாட்சித் தாகியக் கண்ணும் வினைமாட்சி

இல்லார்கண் இல்லது அரண்.- 750

அரண் பல சிறப்புக்கொண்டிருந்தாலும், நல்ல வீரர்களே அதற்கு சிறப்பு

திருக்குறள்- அதிகாரம் - 74. நாடு

 

தள்ளா விளையுளும் தக்காரும் தாழ்விலாச்

செல்வரும் சேர்வது நாடு. - 731

நல்ல விளைபொருள், பெரியோர், நற்செல்வர் நிறைந்ததே நாடு

பெரும்பொருளால் பெட்டக்க தாகி அருங்கேட்டான்

ஆற்ற விளைவது நாடு. - 732

பொருள் வளத்தால் பிறநாட்டாரும் விரும்புவதே நாடு    

பொறையொருங்கு மேல்வருங்கால் தாங்கி இறைவற்கு

இறையொருங்கு நேர்வது நாடு. - 733

செலவுகளிருந்தாலும் மகிழ்வோடு மக்கள் வரிதருவது சிறந்த நாடு

உறுபசியும் ஒவாப் பிணியும் செறுபகையும்

சேரா தியல்வது நாடு. - 734

கடும்பசி, தீராத நோய், பெரும் பகை இல்லாததே நாடு

பல்குழுவும் பாழ்செய்யும் உட்பகையும் வேந்தலைக்கும்

கொல்குறும்பும் இல்லது நாடு.- 735

பிரிவுகள், உட்பகையும், கொடியோரரரும் இல்லாதது நாடு

கேடறியாக் கெட்ட இடத்தும் வளங்குன்றா

நாடென்ப நாட்டின் தலை. - 736

கேடு வந்தாலும், வளம் குன்றாதிருப்பது நாடு

இருபுனலும் வாய்ந்த மலையும் வருபுனலும்

வல்லரணும் நாட்டிற்கு உறுப்பு.-737

ஆற்றுநீர், ஊற்றுநீர், மலை, மழை, அரண் ஆகியன நாட்டிற்கு அணி

பிணியின்மை செல்வம் விளைவின்பம் ஏமம்

அணியென்ப நாட்டிற் கிவ் வைந்து. - 738

நோயின்மை, செல்வம், விளைச்சல், இன்பம், காவல் நாட்டிற்கு அழகு

நாடென்ப நாடா வளத்தன நாடல்ல

நாட வளந்தரு நாடு.      -739

பிற நாடுகளைச் சாராமல் பல வளங்களையும் கொண்டதே நாடு

ஆங்கமை வெய்தியக் கண்ணும் பயமின்றே

வேந்தமை வில்லாத நாடு. -740

நல்ல அரசனால்தான் நல்வளங்கள் மக்களைச் சென்றடையும்

திருக்குறள் - அதிகாரம் - 73. அவையஞ்சாமை

 

வகையறிந்து வல்லமை வாய்சோரார் சொல்லின்

தொகையறிந்த தூய்மை யவர். - 721

நல்ல பேச்சாளர், அச்சத்தினால் தவறாகப் பேசமாட்டார்கள்

கற்றாருள் கற்றார் எனப்படுவர் கற்றார்முன்

கற்ற செலச்சொல்லு வார். -722

கற்றோரும் போற்றுமாறு பேசுவோர் கற்றோருள் கற்றோராவார்

பகையகத்துச் சாவார் எளியர் அரியர்

அவையகத்து அஞ்சா தவர். - 723

போருக்கு அஞ்சாதார் எளியவர், அவையில் அஞ்சாதாரே அரியவர்

கற்றார்முன் கற்ற செலச்சொல்லித் தாம்கற்ற

மிக்காருள் மிக்க கொளல்.- 724

தெரிந்ததைப் புரியுமாறு, கூறி தெரியாததை  கேட்டு அறிக

ஆற்றின் அளவறிந்து கற்க அவையஞ்சா

மாற்றங் கொடுத்தற் பொருட்டு.- 725

நற்சபையில் அஞ்சாமல் பேச, நல்ல நூல்களைப் படி

வாளொடென் வன்கண்ணர் அல்லார்க்கு நூலொடென்

நுண்ணவை அஞ்சு பவர்க்கு. - 726

கோழைக்கு வாள் எதற்கு? அவையஞ்சுவோருக்கு நூல் எதற்கு?   

பகையகத்துப் பேடிகை ஒள்வாள் அவையகத்து

அஞ்சு மவன்கற்ற நூல்.- 727

அவையயஞ்சுபவனின் அறிவு பேடியின் வாளுக்குச் சமம்

பல்லவை கற்றும் பயமிலரே நல்லவையுள்

நன்கு செலச்சொல்லா தார்.- 728

பேச்சுத்திறன் இல்லாதவர்கள் பல கற்றாலும் பயனில்லை

கல்லா தவரின் கடையென்ப கற்றறிந்தும்

நல்லா ரவையஞ்சு வார்.- 729

அவையச்சம் கொள்வோர், கல்லாதாரைவிடக் கீழானவர்

உளரெனினும் இல்லாரொடு ஒப்பர் களன்அஞ்சிக்

கற்ற செலச்சொல்லா தார்.- 730

அவையச்சம் கொள்வோர், வாழ்ந்தும் பயனில்லை

திருக்குறள் - அதிகாரம் - 72. அவையறிதல்

 

அவையறிந்து ஆராய்ந்து சொல்லுக சொல்லின்

தொகையறிந்த தூய்மை யவர்.- 711

பார்வையாளரின் தன்மையறிந்து, ஆராய்ந்து பேசுவோர் நல்ல அறிஞர்

இடைதெரிந்து நன்குணர்ந்து சொல்லுக சொல்லின்

நடைதெரிந்த நன்மை யவர். - 712

சொற்களின் சிறப்பை அறிந்தவர் அதை அவையறிந்து வெளிப்படுத்துவர்

அவையறியார் சொல்லல்மேற் கொள்பவர் சொல்லின்

வகையறியார் வல்லதூஉம் இல். - 713

அவையறியார், சொல்லும் முறையும் அறியார்  ஆவார்

ஒளியார்முன் ஒள்ளிய ராதல் வெளியார்முன்

வான்சுதை வண்ணம் கொளல்.- 714

அவையோருள், அறிவாளி, பேதையர் தன்மையறிந்து  பேசுக

நன்றென்ற வற்றுள்ளும் நன்றே முதுவருள்

முந்து கிளவாச் செறிவு. -715

அறிவுமிக்கவர்கள் முன்னர் பேசாமலிருப்பதே அறிவாகும்

ஆற்றின் நிலைதளர்ந் தற்றே வியன்புலம்

ஏற்றுணர்வார் முன்னர் இழுக்கு. - 716

அறிவாளிகள் முன் ஏற்படும் இழுக்கு, பெருங்குற்றமாகும்

கற்றறிந்தார் கல்வி விளங்கும் கசடறச்

சொல்தெரிதல் வல்லார் அகத்து. - 717

நல்லறிஞர் பேச்சில் நல்ல நூல்களின் பெருமை விளங்கும்

உணர்வ துடையார்முன் சொல்லல் வளர்வதன்

பாத்தியுள் நீர்சொரிந் தற்று. - 718

ஆர்வமுடையார் முன் பேசுதல் நற்பயிருக்கு நீர் பாய்ச்சுவது போன்றது

புல்லவையுள் பொச்சாந்தும் சொல்லற்க நல்லவையுள்

நன்கு செலச் சொல்லு வார்.- 719

அறிவார்ந்த அவையில் பேசுவோர், பேதையார் முன் பேசாமை நன்று 

அங்கணத்துள் உக்க அமிழ்தற்றால் தங்கணத்தார்

அல்லார்முன் கோட்டி கொளல். -  720

அறிவற்றார் முன் பேசுதல் அமுதத்தை கீழே சிந்துவது போன்றது

திருக்குறள் - அதிகாரம் - 71. குறிப்பறிதல்

 

கூறாமை நோக்கிக் குறிப்பறிவான் எஞ்ஞான்றும்

மாறாநீர் வையக்கு அணி.- 701

குறிப்பறிந்து நடப்பவன் கடல்சூழ் உலகிற்கு அணியாவான்              

ஐயப் படாஅது அகத்தது உணர்வானைத்

தெய்வத்தோ டொப்பக் கொளல். - 702

ஐயமின்றி ஒருவர் உள்ளத்தை அறிபவன் தெய்வத்துக்கு சமமாவான் 

குறிப்பிற் குறிப்புணர் வாரை உறுப்பினுள்

யாது கொடுத்தும் கொளல். 703

முகக்குறிப்பால் அகத்தை உணர்வாரை எப்படியும் துணையாகக் கொள்

குறித்தது கூறாமைக் கொள்வாரோ டேனை

உறுப்போ ரனையரால் வேறு. - 704

தோற்றத்தில் ஒத்திருந்தாலும், அறிவால் வேறுபட்டவர் குறிப்பறிவார்   

குறிப்பின் குறிப்புணரா வாயின் உறுப்பினுள்

என்ன பயத்தவோ கண். -705

முகக்குறிப்பால் அகத்தை உணராவிட்டால் கண்களால் யாது பயன்?   

அடுத்தது காட்டும் பளிங்குபோல் நெஞ்சம்

கடுத்தது காட்டும் முகம். - 706

முகமே மனதைக் காட்டும் கண்ணாடி

முகத்தின் முதுக்குறைந்தது உண்டோ உவப்பினும்

காயினும் தான்முந் துறும். -707

இன்ப, துன்பங்களை விரைந்து வெளிப்படுத்திவிடும் முகம்

முகம்நோக்கி நிற்க அமையும் அகம்நோக்கி

உற்ற துணர்வார்ப் பெறின். -708

முகத்தைப் பார்த்தே அகத்தை உணர்வாரிடம் வார்த்தைகள் எதற்கு   

பகைமையும் கேண்மையும் கண்ணுரைக்கும் கண்ணின்

வகைமை உணர்வார்ப் பெறின். - 709

பகையையும், நட்பையும் கண்களே காட்டிவிடும்

நுண்ணியம் என்பார் அளக்குங்கோல் காணுங்கால்

கண்ணல்லது இல்லை பிற. -710

கண்களால் கருத்தை உணர்பவரே நுண்ணறிவாளர் எனப்படுவார்

திருக்குறள் - அதிகாரம் - 70. மன்னரைச் சேர்ந்து ஒழுகல்

 

அகலாது அணுகாது தீக்காய்வார் போல்க

இகல்வேந்தர்ச் சேர்ந்தொழுகு வார். - 691

நெருப்பில் குளிர்காய்வதுபோல் அரசனிடம் அணுகாது, அகலாது பழகு

மன்னர் விழைப விழையாமை மன்னரான்

மன்னிய ஆக்கந் தரும்.- 692

மன்னர் விரும்புவதைத் தான் விரும்பாதாரே அவருடன் நிலைப்பார்  

போற்றின் அரியவை போற்றல் கடுத்தபின்

தேற்றுதல் யார்க்கும் அரிது. -693

ஆட்சியாளருடன் பழகுவோர் சந்தேகத்திற்கு இடமின்றி நடக்கவேண்டும்     

செவிச் சொல்லும் சேர்ந்த நகையும் அவித்தொழுகல்

ஆன்ற பெரியா ரகத்து.- 694

பெரியவா்கள் முன்பு, காதோடு பேசுதல், சிரித்தலும் தவிர்ப்பது நலம்  

எப்பொருளும் ஓரார் தொடரார்மற் றப்பொருளை

விட்டக்கால் கேட்க மறை.- 695

அரசன் மறைக்கும்போதும், சொல்லும்போதும் அதற்கேற்ப புரிந்த நட  

குறிப்பறிந்து காலங் கருதி வெறுப்பில

வேண்டுப வேட்பச் சொலல். - 696

குறிப்பையும், காலத்தையும் அறிந்து மன்னர் விரும்புமாறு கூறு

வேட்பன சொல்லி வினையில எஞ்ஞான்றும்

கேட்பினும் சொல்லா விடல்.- 697

அரசனே கேட்டாலும் பயனுள்ளவை மட்டுமே சொல்லுக 

இளையார் இனமுறையர் என்றிகழார் நின்ற

ஒளியோடு ஒழுகப் படும். - 698

வயதோ, உறவோ, ஆட்சியாளர் முன் பார்க்காது பதவியைப் பார்

கொளப்பட்டேம் என்றெண்ணிக் கொள்ளாத செய்யார்

துளக்கற்ற காட்சி யவர்.- 699

அரசர்க்கு நம்பிக்கையுரியோர் அவர் விரும்பாததைச் செய்யார்

பழையும் எனக்கருதிப் பண்பல்ல செய்யும்

கெழுதகைமை கேடு தரும். - 700

நெடுங்காலம் பழகினாலும் பண்பில்லாதவை செய்யாதே