கருவுற்ற மேகம்.

	மகளிர் கருவுறும் காலம் 10 மாதங்கள் என்று இன்றைய அறிவியல் சொல்கிறது.   பழந்தமிழ் இலக்கியங்கள் மகளிர் கருவுறும் காலம் 12 மாதங்கள்    என்று பதிவு செய்துள்ளன.  சான்றாக ஒரு அகப்பாடல்..    தலைவி கருவுற்றிருக்கிறாள். நினைத்தவுடன் பார்க்க தலைவன்       அருகில் இல்லையே என்ற ஏக்கததுடன் இருக்கிறாள். அதனால் வருத்தத்துடன் அவர் வருவதாகச் சொன்ன காலமும் வந்தது அவர் வரவில்லையே என்று புலம்புகிறாள். அதற்குத் தோழி.. தலைவியிடம் இவ்வாறு சொல்கிறாள். தோழி கேட்பாயாக.. பன்னிரண்டு மாதம் நிறைந்த கருப்பத்தைத் தாங்கித் தளர்ந்து.. நடக்க மாட்டாத,  பச்சைப் புளிச் சுவையில் விருப்பத்தை  உடைய  முதற் சூலை உடைய மகளிரைப் போல.. நீரை முகந்து கொண்டு.. வானத்தின் கண் ஏறாமல், அந்நீரைத் தாங்கிக் கொண்டு  ஒன்றோடு ஒன்று சேர்ந்து.. வளம் மிக்க பல மலைகளை நோக்கி.. பெரிய முழக்கத்தை உடைய மேகங்கள்.. எழுகின்ற கார்ப் பருவத்தை இப்பொழுது பார்த்த பின்பும், காதலர் நம்மைப் பிரிந்து வாராமல் இருப்பாரோ? வருவார் என்கிறாள்.. பாடல் இதோ..                                                        அம்ம வாழி தோழி காதலர்
	இன்னே கண்டுந் துறக்குவர் கொல்லேர்
	முந்நாற் றிங்க ணிறைபொறுத் தசைஇ
	ஒதுங்கல் செல்லாப் பசும்புளி வேட்கைக்
	கடுஞ்சூன் மகளிர் போல நீர்கொண்டு
	விசும்பிவர் கல்லாது தாங்குபு புணரிச்
	செழும்பல் குன்ற நோக்கிப்
	பெருங்கலி வான மேர்தரும் பொழுதே.
	தோழி கூற்று குறுந்தொகை -287 கச்சிப்பேட்டு நன்னாகையார். (தலைவன் பிரிந்த காலத்து, "தலைவர் நம்மைத் துறந்தார்;  இனி வாரார்" என்று வருந்திய தலைவியை நோக்கி, "இதோ கார்ப் பருவம்வந்தது; இனி அவர் துறந்திரார்; வருவர்"  என்று தோழி கூறியது.)

பாடல் வழியே..

1.   மகளிர் கருவுறும் காலம்  12 மாதம் என இப்பாடல் சுட்டும்
கருத்து புதுமையாகவும் அக்கால அறிவுநிலையைப் 
புலப்படுத்துவதாகவும் உள்ளது.

2. கருவுற்ற மகளிருடன் நீர் கொண்ட மேகத்தைப் புலவர் 
ஒப்பிட்ட பாங்கு சிறந்த கற்பனை நயம் கொண்டதாக உள்ளது.

3. கருவுற்ற மகளிர் புளிச்சுவையை மிகவும் விரும்புவர் என்ற 
புலவரின் கருத்து உவமைக்கு மேலும் சுவை சேர்ப்பதாக உள்ளது.

4. தலைவியின் வருத்த நோய்க்குச் சிறந்த மருந்து நம்பிக்கை
என்பதை அறிந்து.. தலைவன் விரைவில் வருவான் என்று சொன்ன தோழியின் கூற்று தோழி ஒரு சிறந்த உளவியல் மேதை என்று பாராட்டத்தக்கதாக உள்ளது.