உங்கள் எழுத்துக்களில் நச்சுநிரல் உள்ளதா?

வேர்களைத்தேடி.........

நச்சுநிரல் சோதனை

நம் கணினிக்கு மட்டும் போதுமா??

நம் எழுத்துக்களுக்கு வேண்டாமா??

நம் எழுத்துக்களையும் ஆய்வு செய்வோம்..

மூங்கில்கள் எல்லாம்

மயக்கும் குழலாவதில்லை!

மழைத்துளிகள் எல்லாம்

அழகிய முத்தாவதில்லை!

தீக்குச்சிகள் எல்லாம்

தீபஒளி தருவதில்லை!

ஆயிரம் ஆயிரம் உண்டு இங்கு

அறிவாளிகள்! ஆனாலும்

அவர்களுக்கெல்லாம் வாய்க்கவில்லை

வலையுலகில் தமிழ் எழுதும் வாய்ப்பு!!

இவ்வரிய வாய்ப்பை

நாம் எப்படிப் பயன்படுத்துகிறோம்?

நம் எழுத்துக்களை உற்று நோக்குங்கள்..

              நம் எழுத்துக்கள்...

புல்லாங்குழலா?

முத்தா?

தீப ஒளியா?

அந்தக் காலத்தில் நந்திவர்ம பல்லவன்

எழுத்துக்களில் நச்சுவைத்து

அறம்பாடிக் கொல்லப்பட்டானாம்..

நம் எழுத்துக்களில் நச்சுநிரல் கலந்துள்ளதா

என்று ஆய்வு செய்வோமா??

  நச்சு எழுத்துக்கள்...

எழுத்துப் பிழை, பிறமொழிக் கலப்பு, தவறான சிந்தனை, தவறான வழிகாட்டல், தன்னம்பிக்கையற்ற வார்த்தைகள்....

போன்ற நச்சு நிரல்கள் நம் எழுத்துக்களில் கலந்திருக்கிறதா?
அதனாலென்ன திருத்திக்கொள்வோம்..

            தமிழ் உறவுகளே..

நம் விரல்களுக்குத் தமிழ் மை ஊற்றுவோம்..

தட்டச்சுப்பலகைகள் வழியே

தமிழ் மொழிக்கு வளம் சேர்ப்போம்..

வேறொருவர் கண்டுபிடிப்புக்கெல்லாம்

நாம் தமிழில் பெயர் கண்டு

இயம்பியது போதும்..

இனிமேலாவது

தமிழனின் கண்டுபிடிப்புக்கு

இன்னொருவர் பெயர் வைக்கும்

நிலையை உருவாக்குவோம்..

நம் துறை சார்ந்த

சிந்தனைகளை

படைப்பாக்கத் திறனை

கண்டுபிடிப்புகளை

அனுபவங்களை

இயன்றவரை இனியதமிழில்

பதிவு செய்வோம்!

• இயன்றவரை இனியதமிழில்

• எழுதுவதெல்லாம் எழுத்தல்ல

கலைச் சொல்லாக்கம்.

virus  - நச்சுநிரல்

Antivirus  - எதிர்ப்பு நச்சுநிரல்